O Concello licita o SAD por tres anos con posibilidade de prórroga e retoma o proceso para a Planta de Residuos de Nostián

O Goberno Local de A Coruña aprobou este mércores en Xunta de Goberno Local a saída a licitación do Servizo de Axuda a Domicilio (SAD) para os próximos tres anos, cunha dotación orzamentaria de 25.492.497,92 euros e a posibilidade de prórroga por outros dous anos máis, o que podería estender a cobertura do servizo ata o ano 2030.

O contrato estrutúrase en seis lotes correspondentes á división por zonas xeográficas da cidade —norte, centro, sur, leste e oeste— máis un lote específico para o control de calidade do servizo. Na actualidade, o SAD presta atención personalizada e intensiva a máis de 1.100 persoas usuarias, configurándose como un recurso de proximidade, preventivo e asistencial orientado a favorecer a permanencia das persoas no seu propio domicilio e a promover a súa autonomía persoal.

Un servizo clave para as dependentes

O Servizo de Axuda a Domicilio constitúe un piar fundamental do sistema público de benestar para as persoas en situación de dependencia ou con limitacións na súa autonomía persoal. Ofrece apoios de carácter persoal, doméstico, psicosocial e socioeducativo ás persoas ou unidades de convivencia que, por razóns de saúde, familiares ou sociais, precisan asistencia para desenvolver as actividades básicas da vida diaria.

Trátase, ademais, dun sector de emprego fundamentalmente feminino, onde as traballadoras soportan historicamente condicións laborais precarias. A nova licitación abre a posibilidade de incorporar melloras sociais e laborais para as profesionais que prestan o servizo, un aspecto que o movemento sindical e feminista vén reclamando desde hai anos.

Nostián: residuos e sostibilidade

Nunha mesma sesión, o Concello acordou retomar o proceso de licitación da Planta de Tratamento de Residuos de Nostián, incorporando actualizacións técnicas e reformulando o tratamento económico do bioestabilizado. O novo estudo de viabilidade computa que o 60% do total do material poderá ser tratado como rexeitamento e aboado á empresa xestora como tal.

O contrato inclúe a remodelación integral da planta e a explotación completa da instalación, dos catro puntos limpos fixos da cidade e do vertedoiro clausurado. Entre as melloras previstas figuran unha nova liña de tratamento, novas naves de compostaxe, ampliación da biometanización, melloras no tratamento de aire e lixiviados e actuacións en dixestores, EDAR e planta de gas.

O Concello estableceu ademais un mecanismo de seguimento: nos anos 10 e 19 de contrato, a empresa adxudicataria deberá xustificar melloras por valor de 2,5 e 5 millóns de euros, respectivamente. A planta de Nostián dá servizo a centos de miles de persoas na cidade e na súa área de influencia, polo que a súa modernización ten un impacto ambiental e sanitario directo sobre toda a contorna metropolitana.

Outros contratos aprobados

A Xunta de Goberno Local tamén adxudicou o Servizo de atención telefónica á cidadanía 010 á empresa Contactnova SLU, cun investimento total de 3.027.162,32 euros para tres anos prorrogables a dous máis. Como novidade, o servizo amplía o seu horario para atender durante os sete días da semana, incluíndo sábados pola tarde e domingos, cubrindo máis de 500.000 consultas telefónicas ao ano.

Así mesmo, adxudicouse o servizo de actividades deportivas municipais á empresa Salzillo Servicios Integrales S.L. cun orzamento de 3.467.806,37 euros para dous anos, beneficiando a máis de 4.000 persoas. O novo contrato incorpora melloras nas condicións laborais das profesionais do sector e un investimento adicional de 15.000 euros en material deportivo e didáctico. Finalmente, resolvéronse as cesións de postos nos mercados municipais de San Agustín e Monte Alto, no marco do plan xeral de mellora das instalacións comerciais da cidade.