O sindicato denuncia que a norma debilita a sanidade pública e pon os intereses económicos privados por diante da recuperación das persoas traballadoras

O Sindicato Nacional de Comisións Obreiras de Galicia (CCOO) anunciou este luns que emprenderá accións xurídicas contra a resolución do 20 de maio de 2026 da Secretaría Xeral Técnica da Consellería de Sanidade, pola que se modifica o protocolo para a xestión clínica e o seguimento da incapacidade temporal (IT). A organización sindical considera que esta norma representa un cambio de modelo que reforza o papel das mutuas privadas no control das baixas médicas en detrimento do sistema público de saúde.

Privatización encuberta

O secretario de Saúde Laboral de CCOO, Armando Iglesias, reclama a retirada inmediata da resolución e sostén que a Xunta presenta a modificación como unha medida de axilización administrativa cando o seu «efecto real» será ampliar as funcións das mutuas privadas no seguimento dos procesos de baixa e «debilitar o papel do sistema público de saúde». Para o sindicato, a Xunta opta por externalizar funcións de tutela sanitaria en lugar de dotar a sanidade pública de máis recursos humanos e materiais.

Un dos cambios máis criticados pola organización sindical é a implantación dunha autorización única que permitirá ás mutuas coordinar, solicitar e executar todas as probas diagnósticas e tratamentos vinculados cun proceso de incapacidade temporal. Segundo CCOO, esta modificación elimina o sistema de autorización individualizada, reduce o control exercido pola administración sanitaria pública e deixa a evolución da baixa en mans de entidades con intereses económicos propios.

Altas prematuras e presión sobre o persoal médico

O sindicato tamén alerta de que a resolución reforza o peso das propostas das mutuas e condiciona a capacidade de decisión do persoal facultativo de Atención Primaria. Esta orientación, advirte Iglesias, «pode favorecer altas médicas prematuras e antepoñer a rápida reincorporación ao traballo á recuperación completa das persoas doentes». Dende a perspectiva de CCOO, sitúase así o criterio económico da entidade xestora por diante do criterio clínico do ou da profesional sanitaria que coñece o caso.

Privacidade dos datos clínicos en risco

Outra das preocupacións do sindicato ten que ver coa protección de datos sensibles. A resolución prevé que os resultados das probas realizadas polas mutuas se incorporen á historia clínica electrónica, o que, segundo CCOO, «amplía o acceso de entidades privadas a información especialmente sensible» das persoas traballadoras e obriga a extremar as garantías de confidencialidade. O sindicato considera que esta cesión de información clínica a empresas privadas require controis moito máis estritos dos que contempla a norma.

Accións xurídicas e diálogo

Ante este escenario, CCOO esixe a «paralización inmediata» da resolución e a apertura dun proceso de diálogo que aborde a xestión da incapacidade temporal desde a defensa do sistema público e dos dereitos laborais. O sindicato xa traballa cos seus servizos xurídicos para impulsar «todas as accións necesarias» co fin de frear a aplicación desta norma. A organización reclama que, en lugar de ampliar competencias ás mutuas, a Xunta invista en reducir as listas de espera e en mellorar a atención sanitaria ás persoas en situación de baixa médica.