O CIM da Universidade de Vigo lidera a única iniciativa española seleccionada no programa Horizonte Europa para revolucionar os pensos de acuicultura con fungos unicelulares.
O proxecto europeo AlFunFeed, liderado polo catedrático José Luis Soengas do Centro de Investigación Mariña (CIM) da Universidade de Vigo, acaba de ser recoñecido pola Unesco como Decade Action – Project dentro da Década das Ciencias Oceánicas para o Desenvolvemento Sostible. Esta incorporación supón un espaldarazo internacional a unha investigación nacida en Galicia que aspira a transformar as bases da acuicultura europea.
A Década das Ciencias Oceánicas é un marco global promovido pola ONU e coordinado pola Unesco para aglutinar proxectos, investigacións e accións colaborativas entre gobernos, equipos científicos, organizacións non gobernamentais, empresas e sociedade civil. O seu fin último é fomentar iniciativas de ciencia, innovación e política pública orientadas a protexer e restaurar os océanos. AlFunFeed pasa así a integrar este selecto catálogo internacional.
Fungos unicelulares fronte á soia
O proxecto propón substituír as proteínas vexetais —habitualmente procedentes de cultivos intensivos como a soia, con elevada pegada ambiental— por proteínas obtidas de fungos unicelulares mediante a súa fermentación con residuos de macroalgas. Esta aposta biotecnolóxica sitúa a Galicia na vangarda dunha acuicultura máis sostible e menos dependente de insumos extractivos ou estacionais.
O modelo responde aos principios da economía circular: os descartes de macroalgas, un recurso abundante nas costas galegas e atlánticas, convértense en materia prima para producir un ingrediente nutritivo destinado a especies carnívoras de alto valor comercial como a robaliza europea, e extrapolable ao rodaballo, a dourada ou o salmón, todas elas relevantes para a acuicultura galega e do norte de Portugal.
Financiamento e fitos próximos
AlFunFeed forma parte da convocatoria Sustainable Blue Economy Partnership (SBEP), vinculada ao programa Horizonte Europa, e conta cun orzamento de 1,23 millóns de euros. É, ademais, a única iniciativa desta convocatoria liderada por un equipo de investigación español, o que reforza o posicionamento internacional do CIM, centro integrado na Rede Cigus da Xunta de Galicia.
O equipo investigador atópase a piques de obter o primeiro lote de proteína fúnxica unicelular producida a partir deste proceso. Para este mesmo mes de xullo está previsto formular as primeiras dietas experimentais para peixes e iniciar os ensaios de alimentación con exemplares en condicións controladas, o que marcará un punto de inflexión no desenvolvemento do proxecto.
Un consorcio con participación galega
Ademais do CIM, o consorcio reúne a actores de catro países europeos. Galicia está representada tamén pola empresa biotecnolóxica ODS Protein, liderada por Iria Varela, e conta co apoio institucional da Axencia Galega de Innovación (GAIN) e da Consellería do Mar da Xunta de Galicia. A nivel europeo, participan o grupo da Università Politecnica delle Marche (Italia), o centro CIIMAR de Portugal, a Universidade de Tesalia (Grecia) e a Federación italiana de pesca e acuicultura (Federpesca).
O recoñecemento da Unesco non só visibiliza o traballo científico desenvolvido desde Vigo, senón que consolida Galicia como espazo de referencia para unha acuicultura que aposta pola sostibilidade ambiental, a redución da pegada de carbono e o benestar animal, valores cada vez máis esixidos polos mercados europeos e pola sociedade no seu conxunto.