A fundación xestiona 52 proxectos activos e máis de 4,5 millóns de euros, con presenza en organismos europeos e cooperación con máis de 15 países
O Centro Tecnolóxico do Mar (Cetmar) celebra este 2026 o seu vixésimo quinto aniversario cunha actividade en plena expansión e cunha folla de ruta que o consolida como un dos referentes mundiais na transferencia de coñecemento científico cara á gobernanza dos océanos. A directora da fundación, Rosa Chapela, compareceu ante a Comisión de Pesca e Marisqueo do Parlamento de Galicia para dar conta dunha traxectoria que, ao longo dun cuarto de século, soubo tecer pontes entre o mundo académico, as administracións públicas e o sector produtivo do mar.
Con 52 proxectos vixentes e un investimento superior aos 4,5 millóns de euros, o Cetmar afronta este aniversario con máis músculo que nunca. O seu traballo abrangue desde o deseño técnico do Plan de Marisqueo 2026-2031 —unha ferramenta esencial para a ordenación dunha actividade estratéxica en Galicia— ata a copresidencia do Grupo de Expertos en Datos para a Ordenación do Espazo Mariño da Comisión Europea, con sede en Bruxelas. Esta dobre dimensión, local e global, é precisamente o que distingue o modelo galego de xestión mariña.
No ámbito autonómico, os datos e evidencias xeradas polo centro nutren instrumentos clave como a Estratexia de Economía Azul ou proxectos de acuicultura como SoL-Ouxa II, Bateas e Apromex, cuxos resultados se transfiren directamente ao sector bateeiro mediante o plan Capacitamex. Isto supón que a investigación non queda en publicacións académicas, senón que se converte en coñecemento aplicado que mellora a produción e a sustentabilidade do sector.
A nivel europeo, o Cetmar coordina o secretariado dos Grupos Rexionais de Coordinación da Política Pesqueira Común, garantindo a harmonización dos datos que determinan as cotas de pesca en organismos internacionais. Ademais, integra o European Marine Board e alimenta plataformas de referencia como EMODnet, o Blue Economy Observatory ou o proxecto ReMap con información socioeconómica e de emprego do sector pesqueiro galego e europeo.
Máis aló das fronteiras europeas, o centro trasladou o modelo galego a máis de quince países de África e América Latina no ámbito da cooperación internacional, con impacto demostrado na seguridade alimentaria de comunidades costeiras vulnerables. Este exercicio amplía a súa presenza a Oriente Medio, México e Costa Rica, respaldado por unha auditoría externa independente que avalou a súa credibilidade institucional.
O Observatorio Costeiro de Galicia (OCXG), dependente do Cetmar, constitúe ademais un pilar fundamental para a aplicación das leis galegas de ordenación do litoral e de resposta ao cambio climático, mentres que o traballo continuado en contaminación mariña dá soporte ao Plan Marlimpo e ao control de contaminantes emerxentes.
O capital humano é, segundo a propia dirección, a base de todo este éxito. O equipo está formado por 55 profesionais de perfil multidisciplinar. Neste sentido, cómpre destacar que o Cetmar vén de aprobar o seu primeiro Plan de Igualdade, con 33 medidas concretas orientadas á conciliación e á equidade laboral, un paso que, aínda que tardío nun centro de referencia cunha cuarta parte de século de historia, supón un avance relevante cara a un modelo de institución máis xusta e inclusiva.
O Cetmar representa, en definitiva, un exemplo do potencial que ten o investimento público en coñecemento aplicado cando está ao servizo do ben común e da soberanía dos pobos sobre os seus recursos naturais. Galicia, nación atlántica con vocación mariña secular, conta neste centro cunha ferramenta estratéxica para defender os seus intereses no mar ante as institucións europeas e internacionais.