Anfaco-Cytma, o Círculo de Empresarios de Galicia e a Alianza Q-Cero reúnen a acuicultura, pesca e loxística portuaria para trazar a transición ecolóxica
Vigo acolleu a xornada ‘Descarbonización na BIOeconomía azul’, un encontro impulsado por Anfaco-Cytma, o Círculo de Empresarios de Galicia e a Alianza Q-Cero —da que forma parte a multinacional enerxética Iberdrola— co obxectivo de analizar os desafíos e as oportunidades que presenta a transición cara a modelos produtivos máis sostibles no ámbito do sector mar-industria galego.
O encontro reuniu representantes de distintos subsectores estratéxicos para a economía galega: acuicultura, pesca, loxística portuaria, refrixeración industrial e xestión da pegada de carbono. O debate centrouse na necesidade de avanzar cara á eficiencia enerxética e na redución das emisións de CO₂, retos que o tecido produtivo vinculado ao mar non pode seguir adiando nun contexto de emerxencia climática e de crecentes esixencias regulatorias europeas.
Na clausura do acto, o alcalde de Vigo, Abel Caballero, trasladou o compromiso do Concello coa transición ecolóxica, mencionando que parte da enerxía consumida en instalacións municipais, como ascensores e ramplas mecánicas, xa provén de fontes renovables. “É o noso compromiso co que sucede; compartimos o voso traballo”, afirmou, anunciando que o goberno local continuará apostando pola eficiencia enerxética e o consumo responsable.
Malia a relevancia do debate, cómpre sinalar que a presenza de Iberdrola como promotora da Alianza Q-Cero merece unha lectura crítica. A gran corporación enerxética, cuxa estratexia de negocio en renovables non sempre redunda no desenvolvemento industrial local nin na soberanía enerxética dos territorios, ocupa un papel central nunha axenda que debería estar protagonizada por modelos de xestión pública, cooperativa e comunitaria da enerxía. A descarbonización real do sector mar-industria galego require non só eficiencia tecnolóxica, senón tamén un modelo de gobernanza que garanta que os beneficios da transición enerxética queden en Galicia e non se transfiran a accionistas de grandes multinacionais.
O sector pesqueiro e conserveiro galego, vertebrador da economía costeira e empregador de miles de traballadoras, afronta nun contexto global a presión de cumpriren os obxectivos climáticos europeos sen perder competitividade. A xornada celebrada en Vigo pon de manifesto que existe vontade de avanzar, mais a cuestión de quen lidera e quen se beneficia desa transición seguirá sendo central no debate económico e social dos próximos anos.