O Goberno destina 130 millóns de euros á cuarta edición desta iniciativa, que xa beneficiou a máis de 4 millóns de persoas desde 2023.

O Consello de Ministros aprobou o pasado 9 de xuño a cuarta edición do programa Verano Joven, unha iniciativa que, desde o seu lanzamento en 2023, acumula xa máis de catro millóns de beneficiarios en todo o Estado. Para esta edición, o Goberno reservou 130 millóns de euros co obxectivo de sufragar descontos de ata o 90% en billetes de autobús e tren para a mocidade de entre 18 e 30 anos.

A medida, que aplica sobre os servizos estatais de transporte, chega nun contexto en que a mobilidade segue a ser un dos principais obstáculos económicos para a poboación nova, especialmente en territorios como Galicia, onde as conexións de transporte público con moitas áreas rurais e semiurbanas son aínda deficientes. Desde este xornal consideramos que, se ben o programa supón un avance no acceso ao transporte colectivo, non debe substituír o esforzo estrutural de mellorar a rede de servizos de media e longa distancia que conectan as vilas e comarcas galegas co exterior.

**Quen pode beneficiarse e como se solicita**

Poderán acollerse ao programa os mozos e mozas con nacionalidade española ou residencia legal en España, nacidos entre o 1 de xaneiro de 1996 e o 31 de decembro de 2008. O rexistro é gratuíto e realízase a través da web do Ministerio de Transportes e Mobilidade Sostible, mediante o DNI, NIE ou pasaporte, e empregando o sistema Cl@ve ou identificación manual con datos do documento de identidade. Unha vez validada a solicitude, a persoa beneficiaria recibe un código persoal e intransferible, vía SMS ou correo electrónico, que deberá presentar ao adquirir os billetes nas plataformas dos distintos operadores. O código debe solicitarse con polo menos 24 horas de antelación á compra do primeiro billete.

As empresas poderán cobrar ata un euro por billete en concepto de gastos de xestión, o único custo que recaerá na persoa usuaria.

**Descontos por modalidade de transporte**

No caso do autobús regular de competencia estatal, o desconto chega ao 90%. Para o tren, os descontos varían segundo o tipo de servizo: o 90% nos trens de media distancia convencional e de ancho métrico —moi relevantes para Galicia—; o 50% nos títulos sinxelos de Avant; e o 50%, cun límite de 30 euros por billete, nos servizos de longa distancia e alta velocidade de todos os operadores ferroviarios. Para viaxes por Europa, o programa contempla un desconto do 50% sobre o Pase Interrail Global flexible de 10 días en 2 meses, cando se adquira a través de Renfe.

**Condicións de uso e sancións**

O programa establece medidas para evitar usos fraudulentos. O código é estritamente persoal e a súa cesión a terceiras persoas pode implicar multas de ata 750 euros en transporte ferroviario e de ata 200 euros en autobús. Ademais, acumular máis de seis usos indebidos —como non cancelar un billete con 24 horas de antelación ou ceder o código— pode acarrear a retirada definitiva do acceso ao programa.

Desde O Xornal Económico de Galicia valoramos positivamente que esta iniciativa reduza as barreiras económicas para a mobilidade da mocidade, pero insistimos en que os descontos en transporte público deben ir acompañados dunha aposta decidida pola mellora das infraestruturas ferroviarias e de autobús en Galicia, especialmente no interior do país, onde a dependencia do vehículo privado segue sendo practicamente total pola falta dunha oferta pública de calidade.