A Xunta de Goberno aprobou 50 asuntos, dos que 630.000 euros van para os concellos e máis de 571.000 para entidades da provincia
A Xunta de Goberno da Deputación Provincial de Ourense celebrou esta semana a súa sesión ordinaria coa aprobación de 50 asuntos e a mobilización de recursos por un importe total de 1.201.220,12 euros. Os fondos repártense en dous grandes bloques: máis de 630.000 euros destinados á cooperación cos concellos da provincia e 571.139,50 euros para a colaboración con entidades sociais, deportivas, empresariais e territoriais.
Entre as medidas de cooperación municipal destacan a subvención de 150.000 euros para a ampliación do centro deportivo de Barbadás, os 60.000 euros para o Punto de Atención Infantil (PAI) de Sandiás —un servizo clave para a conciliación da vida laboral e familiar nas zonas rurais— e os 40.000 euros para a reparación de vías públicas no concello de Monterrei. Tamén se recollen modificacións do Plan CooperOU solicitadas polos municipios de A Bola, Pereiro de Aguiar e Melón, así como investimentos en mantemento viario, obras en camiños rurais e proxectos de innovación local impulsados polo concello de San Xoán de Río, ao que se destinarán preto de 54.000 euros en iniciativas como Rural Move, Rural EU ou o Festival da Lonxevidade.
Unha das partidas con maior impacto territorial é a de 200.000 euros aprobada para os Grupos Supramunicipais de Emerxencias (GES). Os GES de Castro Caldelas, A Gudiña, Laza, Muíños e a Mancomunidade da Comarca de Celanova recibirán 40.000 euros cada un para cubrir os seus gastos de funcionamento en 2026. Segundo a propia institución, a Deputación de Ourense é a única deputación provincial galega con unha liña específica de apoio económico a estes servizos de emerxencias, esenciais para a protección civil nos concellos rurais.
No ámbito social, aprobáronse case 100.000 euros para entidades que traballan con colectivos vulnerables: 50.000 euros para a Asociación Aixiña, 25.000 para o proxecto Hogar Galicia da Fundación Monte do Gozo e 24.139,50 para a Asociación Recreativa As Burgas, destinados á renovación das camas da súa residencia. Trátase de recursos que sosteñen o traballo de organizacións sen ánimo de lucro que cobren lagoas asistenciais que as administracións non garanten directamente.
No terreo da promoción económica, a sesión deu luz verde a 115.000 euros para a Fundación de Feiras e Exposicións de Ourense e a 80.000 euros para o programa ExportOU da Confederación Empresarial de Ourense, orientado á internacionalización das empresas da provincia. Estas partidas, canalizadas a través de entidades patronais e fundacións empresariais, merecen un seguimento rigoroso para verificar o seu impacto real no tecido produtivo local e no emprego de calidade.
A sesión tamén recolleu acordos de carácter organizativo para as escolas provinciais —Artes e Oficios, Gaitas e o Centro de Cultura Popular Xaquín Lorenzo— de cara ao curso 2026-2027, así como a fixación dos prezos de dúas publicacións do Plan Anual de Publicacións 2026, entre elas unha edición en castelán sobre o Camiño Mozárabe na provincia de Ourense, o que suscita interrogantes sobre o compromiso real da institución coa normalización lingüística do galego nas súas propias edicións.